أبوتريكه بيسأل
*
بسم الله الرحمن الرحيم
ابوتريكه بيسألنا لعبت رياضه النهارده؟!!
أنا لما شاهدت الإعلان إنتابتنى حالة من الضحك الشديد وبعد الضحك دخلت فى حاله تفكير عميق وبدأت أسال نفسى ايه الهدف من الاعلان؟
بجد الدوله خايفه على صحت المواطن وقامت بعمل إعلان وصرف مبالغ كبيرة لكى توعى المواطن المصرى لممارسة الرياضة!!!
طيب ازاى! خايفه على صحته والدوله عارفه إن مافيش حاجة واحدة بيتناولها المواطن المصرى سواء أكل او شرب الإ وهى ملوثه او مسرطنه طبعا استبعدت الفكرة دى تماما واستعدت بالله من الشيطان الرجيم من الوساوس دى.
ولما فكرت تانى لقيت الإعلان بيقول بالصور إننا نجرى،
ساعتها فكرت إن الدولة هاتنزل اتوبيسات جديدة اسرع شوية من الاتوبيسات الموجود وعايز تمرن المواطن شويه عشان يجرى بسرعة وراء الاتوبيس الجديد اللى بردوا مش هايلحقوها.
هم القائمين على الاعلان مش عارفين ان اكتر شعب بيجرى هم المصريين انهم
بيجروا على أكل عيشهم من جهة و بيجروا وراء الاتوبيسات كل يوم مرتين فى اليوم او اكتر من جهه تانية
ولما فكرت تالت قولت يمكن الدوله عايزنا نتمرن شويه على الجرى عشان انتخابات الرئاسة اللى جايه ومن اللى هايحصل فيها من مشدات عسكرية وقنابل مسيله للدموع واعتداءات على المواطنين واعتقالات فقالت نوعى المواطنين ونخليهم يتمرنوا على الجرى عشان وقت الإنتخابات منعتقلش الشعب كله واهو اللى اتمرن هايجرى بسرعه ورجال الأمن مش هايلحقوا يمسكوه واللى مسمعش كلام ابو تريكه اهو يشرفنا فى المعتقل الى أن يشاء الله........
بس انا بقه توصلت لفكره اعلان تكسبهم دهب وهى عمل درع،
مش درع الدورى لاء انا اقصد عمل درع واقى للمواطن يرتديه وهو نازل يجيب رغيف العيش الصبح او ملابس واقيه ضد الأسلحة البيضاء وساعتها الراجل هاينزل من بيته كل يوم الصبح من غير مايودع اولاده كانه رايح الحرب خايف لاياخد مطوه او سكينه وهو بيزاحم على طابور العيش فبتهيالى إعلان زى دا وعمل الملابس دى فكرة رهيبه لكسب اموال طائله من المواطن المطحون وبردوا اللى يعمل الإعلان ابوتريكه ويطلع وهو ماسك الدرع الواقى فى ايد ودرع الدورى فى الإيد التانية...
وفكره تانيه وهى توزيع زوج من أحذية البيتيناج طبعا ناس كتيره أول مره تسمع يعنى ايه بيتيناج هو عباره عن حذاء ملصق بأرضيته عجل دا بيستخدمه الناس الأغنياء كرياضة ومتعة وترفية. أعتقد إن متعة وترفية هم اللى محتاجين شرح وتوضيح أكتر للمواطن المصرى اللى عمره ماهايشوفهم ولا هايحس بيهم .
الدولة هانصرف الحذاء لكل موظف بحجه انه يجرى أسرع وراء الاتوبيسات وأهو لو ملحقش الاتوبيس كالعادة ساعتها المصلحة هاتضمن وصول الموظف بدرى شوية على عكس الحذاء العادى..
ساعتها إفتكرت
إعلانات ماما كريمة مختار ومحلول الجفاف و أد أيه كانت إعلانات مفيدة وبتمس الناس
والفنان احمد ماهر الراجل مش بس بكلمته الراجل برعايته لبيته واسرته وغيرها من الأعلانات اللى افادت الناس بحق وحقيقى.
وفى الاخر تفكيرى وصلنى الحمدلله وهدانى إلى إن الإعلان دا مش مقصود بيه الشعب المصرى دا يقصدوا بيه شعب دوله تانية وضمير استقر على الفكره دى لإنها هى الأقرب للواقع .
كنت أتمنى إن المبالغ اللى إتصرفت على إعلان الله أعلم إيه الهدف منه ومن هو المستفيد من وراءئه كانت إتصرفت على المواطن الغلبان اللى مش لاقى يأكل و قال عايزينه يلعب رياضة اتمنى اشوف ابو تريكه فى إعلان قريب بيسال الناس
إتعشيتوا النهارده؟
ساعتها المسئولين هايطلعوا يقولوا أصل المواطن عامل رجيم!!!
وشكرااا,
كتبتها ......وسام الحديدى
