زيت الزيتون بين الغش والمضمون
*
::
:: زيت الزيتون بين الغش والمضمون ::
سبب طرح هذا الموضوع بهذا التفصيل
هو حالة الاستغلال من قبل التاجر للمواطن ( المستهلك )
معتمد على عدم معرفته بزيت الزيتون
وعدم اطلاعه على تفاصيل العلبة التي يشتريها
خلوني قبل ما أبدا أقول لكم السالفة
كان يا ماكان..كان جمبنا جيران من سوريا الله يذكرهم بلخير ..
كانوا يهدونا زيت زيتون لما يجو من السفر ..
بس شي محترم وخلونا فعلا نعرف زيت الزيتون الحقيقي من طعمه وريحته ولونه
.. صحيح أني سعودي للنخاع
..
لكن راح أعطيكم تفاصيل من واقع تجربه
وحب لزيت الزيتون ومعلومات علميه.
:: ملف اكروبات شامل ::
تاريخ زيت الزيتون + زيت الزيتون في القران الكريم + زيت الزيتون في السنة
الإعجاز العلمي للقران والسنة + أقوال السلف في زيت الزيتون
شجرة الزيتون في العلم الحديث وفوائده+ الأهمية الاقتصادية لشجرة الزيتون
كل هذا في اكروبات ( اضغط هنا )
الحجم k.B 120
::أنواع زيت الزيتون::
أنواع زيت الزيتون .. حسب المواصفات الخليجية
واللي هي أصلا مستقاه من المواصفات العالمية ..
اربع أنواع رئيسية تقريبا
1- زيت زيتون بكر
2- زيت زيتون مكرر
3- زيت زيتون متبقى الزيتون
4- زيت زيتون المخلوط
ملحوظه النوع الثاني والثالث والرابع هي الانواع اللي انسحبت
من السوق السعودي قبل فتره علشان المواد المسرطنه اللي فيها
لكن لاسف أنها رجعت مره ثانيه
نتعرف عليهم بالتفصيل
((1))
:::: زيت الزيتون البكر ::::
وبعضكم بيقول ياخي والله أحترنا ما ندري ينصبون علينا ولا وش القصه
مره يقول زيت زيتون بكر عادي
مره زيت زيتون ممتاز
مابقي إلا يقولون زيت زيتون بكر مطنوخ
.
شف يا طويل العمر ..
تعريف زيت الزيتون البكر
هو زيت مستخرج من ثمار الزيتون بطرق ميكانيكية أو طبيعية
وعندما يعصر مباشرة يكون مناسب للاستهلاك الادمي
بدون أي معالجه وهذا الشي يسمى عصره أولى .
ويقسم زيت الزيتون البكر ( واللي هو العصره الاولى )
الى ثلاث أقسام حسب نسبة الحموضة
1- زيت زيتون بكر ممتاز نسبة الحموضة أقل من 1%
2- زيت زيتون بكر درجة أولى نسبة الحموضة أقل من 1.5
3- زيت زيتون بكر عادي نسبة الحموضة أقل من 2%
ونسبة الحموضة تأثر على مكونات زيت الزيتون
وكل ما كانت الحموضة قليله كان الزيت أجود .. وأكثر فائدة
طيب وش نستنتج من الكلام هذا
أن لما يقول زيت زيتون بكر
أعرف أنه طبيعي غير معالج وهو الافضل ويعتبر عصرة أولى
و هذا الزيت البكر
يوجد أنواع منه حسب الحموضة اللي موجودة فيه .. أوكي أتفقنا .
الانواع الثلاثه المتبقية
من زيت الزيتون
هي اللي يكون فيها اللعب والاستغفال للمستهلك
من قبل التجار في السعوديه والخليج .
((2))
:: زيت زيتون مكرر ::
وهذا حسب المواصفات القياسية الخليجه والعالميه
هو .. عبارة عن زيت زيتون بكر ولكنه غير صالح للاستخدام الادمي
لان نسبة الحموضه فيه مرتفعه جدا
وهذه الحموضه مضره للإنسان وقد تسبب له السرطان ..
لذلك
يقومو في المصانع بعمليات معالجه وتكرير لهذا الزيت ..
يصبح صالح للاستهلاك الآدمي .
((3))
:: زيت متبقى الزيتون ::
وهذا حسب المواصفات القياسية الخليجية والعالمية .
هو .. عبارة عن متبقى الزيتون أو ( تفل الزيتون )
وتفل الزيتون هو أكوووام من بقايا ثمرة الزيتون المعصورة
أكوم لونها أسود لا تستطيع أن تستخلص منها أي زيت بطرق الطبيعية
ولكن
عن طريق مذيبات عضويه ( هكسان بنزين )
تضاف الى هذه الاكوم ينتج لدينا زيت
ليس له ( لا طعم ولا لون ولا رائحه )
يضاف الليه بعد ذلك
أصباغ خضراء مستخرجه من أوراق شجرة الزيتون ونكهات زيت زيتون ..
وهذ أنواع زيت الزيتون وفوائد زيت الزيتون فيه شبه معدومه .
وهذا النوع للاسف منتشر عندنا في السعوديه
ويباع بأسعار غالليه
وراح نشوف هذا الشي في القسم الثاني من الموضوع .
((4))
:: زيت الزيتون المخلوط ::
وهذا حسب المواصفات القياسية الخليجية والعالمية
هو .. زيت زيتون بكر مخلوط مع زيت زيتون مكرر أو مخلوط مع زيت متبقى الزيتون .
أو مع اي نوع من أنواع الزيت
هذي أنواع زيت الزيتون .. بشكل عام
كيف أعرف نوع زيت الزيتون اللي أشتريه؟؟
أكيد عن طريق الطعم والرائحه وللون
لكن
هذي الاشياء ما تجي إلا عن طريق كثرة الاستخدام ( الخبرة )
مثل اختيار نوع العسل الأصلي
فمع تذوق الأنواع لأصلية ومقارنتها بغيرها
لكن اللي يجينا عبارة عن قوارير عن طريق شركات
ونتوسم فيهم الصدق في المعلومات الموجودة على القوارير مع أني أحيانا أشك
وعن طريق مشاهدة العلبة من الإمام أو من الخلف فتحصله مفصلك الموضوع
يا زيت زيتون بكر عادي أو درجه أولى أو ممتاز
ونسبة الحموضة والمصدر من تركيا مثلا أو أسبانيا
أو يكون مكرر أو متبقي الزيتون
كيف مع تشابه المواصفات إلا أن الطعم يختلف ؟؟
بعضكم يقول .. طيب هذي القارورة A نفس مواصفات القارورة B
ومع كذا في اختلاف في الطعم ..
لان هذا يرجع لمصدر الزيت سوري تركي اسباني
فتربه تختلف نوعية الزيتون وغيرها من الامور
علشان كذا ( التجربة ) مهمة في اختيار نوع اللي يناسبك
هل يوجد أنواع في السوق مشهورة ومع كذا تعتبر رديئة ؟؟
يوجد وبشكل ملفت لنظر
لدرجه أنه فيه نوع مشهور مرررره
ومن عرفت نفسي وهو موجود ويعتبر أغلى شي في الأسواق
ومع كذا يعتبر أردى نوع ( زيت متبقى الزيتون )..
وطمه ورائحته سيئة بس خلاص الناس تعودوا عليه للأسف.
وواحد من الشباب اللي أعرفهم يشتريه
ولما سألته قد قريت وش مكتوب عليه يقول صراحة لا أهم شي زيت زيتون!!!
وراح تشوفون صور منه في القسم الثاني من الموضوع .
(( القسم الثاني ))
::: نماذج من أنواع زيت الزيتون في الأسواق السعودية ::
للأسف الأسواق السعودية تعج بالسيئ ولا تخلو من الأنواع ذات الجودة .
للتنويه
لن أتعرض
لاسم أي شركه أو ماركه
لا تلتزم بزيت الزيتون البكر
لان الهدف من الموضوع هو التوعية
وليس التشويه
ويمكن الشركات هذي لما تعرف أن المواطن أصبح واعي
راح تجيب الشي ذو الجودة العاللية
.
والنقطه الثانيه الانوع غير زيت الزيتون البكر
شي مسموح به في الاسوق والتاجر حر في اللي يجيبه
لكن المشتري واجب يكون ذكي في اللي يختاره
::: بدون مصدر :::
أحنى عندنا مشكله كبيره
وهي
أن أي شي يجي في
علبه بلاستك أو مغلف في بأوراق مدري وش تبي ولا بدون أسم ....
يعتبر أصلي أو ( بلدي ) يعني شي طازه
كمثال طلعت مره من المسجد وفيه راعي دينا ( سيارة نقل )
موقف سيارته ويبيع منتجات سوريه ومنها زيت زيتون في جركل كبير
طابع عليه بورقه A4 زيت زيتون أصلي بكر
والناس تشتري من عنده ومتحمسه
لأنها متخيله الشي هذا ( بلدي ) يعني شي طازه
ولما ذقت زيت الزيتون لقيته أي كلام ما في أمل أشتريه
وحموضته عليه مره وربحته غير جيده
ونفس الشي ينطبق على العسل أو غيره لما تشتريه
من المتجولين .
وللأسف الشي هذا أنتقل لسوبر ماركت الكبير
مثل بنده والسدحان وجيان وكارفور
سارت تبيع زيت زيتون بدون أي مواصفات
أو مصدر
مثل الصوره هذي
فأنا أنصح عدم شراء
مثل هذي الأنواع لأنك ما تعرف لا مصدرها ولا نسبة الحموضة
وحتى تاريخ الإنتاج والانتهاء مكتوب بالليد أو مو مكتوب .. ممكن يكون فيه لعب ..
::: تفاوت في الاسعار :::
في الاسعار تجد التنافض العجيب ..
فتجد
زيت متبقى الزيتون ..أغلى من ..زيت زيتون بكر !!!!
والسبب أن الشركه المورده لزيت متبقى الزيتون
تستغل اسمها القديم في السوق لترفع السعر
رغم رداءة المنتج
وكمثال
هذي مقارنة ( حقيقيه )
الذي في الليمين متبقى الزيتون من شركة A
والذي في الليسار زيت زيتون بكر من شركة B
::: زيت زيتون مكرر :::
ومثل ما ذكرنا في بداية الموضوع
أن هذا الزيت أصلا زيت غير صالح للاستخدام
لزيادة الحموضة بشكل عاللي
ثم تم معالجته لجعله صالح للأستخدام
ومع كذا الناس تشتريه رغم ارتفاع سعره
هههه والمفارقه المضحكه يكتبو زيت زيتون مكرر خالص 100%
المشتري يضن أنه يعني أحنا ارهب زيت زيتون وخالص ميه بالميه
لكن
الشركه قصدها انه خالص من الحمضيات الزائده
وغيرها من المعالجات اللي تمت على الزيت لانه مو بكر
::: زيت زيتون مخلوط :::
النوع الاول
زيت دوار الشمس مع زيت زيتون
مع مكسبات نكهة ههه حشى بيرة مو زيت زيتون
والبيتاكاروتين يستخدم لمنع الأكسدة وهو مصدر لفيتامين A
مدري أحس إني اشتري كورن فلكس على الفيتامينات ذي
يعني زيت الزيتون بركته وفائدته بكل مافيه من عناصر طبيعيه
لكن اللي ساير
أن الشي اللي في العلب هذي عبارة عن ( زيت ) فقط
وعن طريق نكهات ألوان وفيتامينات
يحاولوا يخلوه قريب من زيت الزيتون
والمشكلة أحنى مازلنا نشتري
مدهرين الشركات بخلط زيت الزيتون بزيت دوار الشمس
هذي شركة ثانيه
وكمان هذي شركة ثالثه
تخلط زيت الزيتون مع زيت دوار الشمس
نوع نوع ثاني
من أنواع زيت الزيتون المخلوط
عباره عن
زيتون بكر + زيت زيتون مكرر
السؤال الكبير .. وش اللي يحدني اشتري هذا النوع ؟؟
مع أن فيه
أنواع زيت زيتون بكر خالص . وبنفس السعر وأرخص أحيانا..
أما نوع ثالث
من أنواع زيت الزيتون المخلوط
عباره عن
زيت زيتون متبقى الزيتون + زيت زيتون بكر
بصراحه وضع غريب أردى نوع ( زيت متبقى الزيتون )
ومخلوط مع بكر
والمشكله سعره غاللي ..
على أيش يعني
هذا بشكل عام الأنواع اللي موجودة في السوق ..
::: طيب هل فيه أنوع معينه تستخدمها وتنصحنا فيه ::
صراحة عندي قواعد مهمة بالنسبة لي
1- لا أشتري من الشركة تجيب الجيد والرديء
يعني مثلا الشركة A تجيب زيت زيتون بكر وبرضو تجيب زيت متبقي الزيتون
هذي الشركة ما أشتري منها
2- أشتري من الشركة اللي تجيب ( البكر فقط )
دعم لها وثقه فيهم
3- يوجد أكثر من نوع ممتااااااز في السوق
اللي أنا أستخدمه بشكل أساسي هو زيت الليسا اولا وبعد زيت الجوف
أخيرا خلصت
ويارب أكون قدرت أوصل المعلومه بشكل واضح
نشوفكم في موضوع قريب بأذن الله
أخوكم
منقول مجموعة ابو نواف
